دوسرا کنارہ ریاض لغاری
دوسرا کنارہ
نظمیں غزلیں اشعار قطعات و رباعیات
شاعر:ریاض لغاری
جاں بلب ( نظم )
جاں بلب ' آبلہ پا
سسکیاں ' آہ و بکا
بے بسی نوحہ کناں
المیہ اَشْکِ رَواں.
دشت بے آب و گیاہ
نا بلد آہ و فغاں
نہ کوئی نالہ رسا
نہ کوئی حفظ و اماں !
دستور کی دستک( نظم)
سکوت شب کی فسوں گری کے عتاب سے مضمحل سماعت نے قفل توڑا
دَریدَہ دستور نے مجسم سوال بن کر عدالتوں میں صدا لگائی
ندا یہ سن کے کہا یہ منصف نے کہ وہ دستور کی سنیں گے
بھلا ہو منصف کا لاج رکھ لی
در عدالت ' مہین دستک نے اعلیٰ منصف کی بیش قیمت سماعتوں تک رسائی پا لی
سکوت ٹوٹا امید جاگی کہ ایک دن میرے اعلیٰ منصف
مری دہای و آہ و زاری کو بھی سماعت کا شرف دیں گے
کہ میں بھی دستور کی ضمانت پہ منتظر ہوں کہ
میرے منصف مرے محافظ مجھے بھی میرے حقوق دیں گے
مجھے بھی دستور کے مطابق مقام دیں گے
میری بقا کو دوام دیں گے' جفا کو اک دن لگام دیں گے
تحدید و مقاومت
تیری تحدید کہ محدود کیا جائے مجھے
تیری خواہش کے سلاسل ہوں میرے پیروں میں
تیرا ارشاد کہ لب سی دیے جائیں میرے
تیرا شکوہ ہے کہ گستاخ ہوا جاتا ہوں
میرے مالک میرے حاکم میرے عالی جاہ!
جانتا ہوں کہ یہ بے باک جسارت میری
آپ کی طبع نازک پر گراں گزرے گی
کیا کروں چارہ نہیں اس کے سوا!
میں جو عرصے سے تیرے خوف کے سائے میں رہا
خندہ پیشانی سے برداشت کئے جبر ترے
نسل در نسل تیری مدح سرائی کی ہے
اب تیرا بوجھ اٹھانے کی سکت باقی نہیں
تیری تحدید ' تیرے حکم ' یہ شاہی فرمان
اب میرے جسم میں لرزہ نہیں پیدا کرتے!
اب مجھے حبس کی اس قید سے آزاد کر و
اب مساوات کا اعلان کرو
اک نئے عہد کا آغاز کرو
اے عورت
اگر ایک ہزار مرد تمہاری محبت میں مبتلا ہوں تو
یقیناً رسول حمزہ توف ان میں سے ایک ہوگا
اور اگر سو مرد تمہاری محبت میں گرفتار ہیں تو
رسول حمزہ توف ان میں ظاہر ہے شامل ہوگا
اور اگر دس مرد تمہاری محبت میں ڈوبے ہوئے ہیں تو
یہ کیسے ہو سکتا ہے کہ رسول حمزہ توف ان میں سے ایک نہ ہو
اور اگر
صرف ایک مرد تمہاری محبت میں مبتلا ہے
تو وہ رسول حمزہ توف کے سوا اور کون ہوگا
لیکن !
اے عورت
اگر تم تنہا ہو
اکیلی ہو
اور کوئ بھی تمہاری محبت میں مبتلا نہیں ہے
تو یقین کرلینا کہ
کہیں بلند پہاڑوں میں
رسول حمزہ توف
مر گیا ہے
رسول حمزہ تؔوف
انتخاب : - متفرق اشعار مختلف غزلوں اور نظموں سے لیے گئے متفرق اشعار
کچھ تو اپنی ہر تمنا کی تپش ہوتی ہے
اور کچھ لوگ بھی شعلوں کو ہوا دیتے ہیں
جو آندھیوں میں پانیوں کے الٹےنہ رخ کھے سکے
وہ ناؤ نا خدا سیہ ' پتوار با د باں سیہ
سحر قریب ہے کٹنے کو ہے شب ظلمت
میرے وطن کے مکیں دل میں حوصلہ رکھیں
خزاں کے سامنے نے خدا کے سامنے ہم لازوال بن جائیں
جگر کے خون سے گلشن سدا ہرا رکھیں
کس کس نے ازار دیے ہیں کس کس نے برباد کیا
اپنوں نے پر نوچ لیے جب غیروں نے آزاد کیا
افق پہ گھٹائیں سی چھانے لگی ہیں
زمیں پہ سیاہی بڑھانے لگی ہیں
ہوسکتا ہے مٹ جاؤں تیرے جور و جفا سے
ہوسکتا ہے بڑھ جائے جنوں اور زیادہ
میرے بنائے ہوئے ریت کے گھروندے ہیں
یہ بحر میں جو ابھرتا ہوا جزیرہ ہے
خواب لے کے آنکھوں میں اپنی اپنی منزل کے
کارواں سفر پیما اپنی اپنی راہوں میں
کس ٹہنی پہ جوڑ کے رکھیں تنکے ہم بیچارے لوگ
نہ گلشن نہ موسم اپنے ہم پنچھی بنجارے لوگ!
نہیں ثبات جہاں کو جہان فانی ہے
سنا ہے بلبلہ پانی کا زندگانی ہے
تو دل میں زخم لیے مسکرا کے ملتا ہے
سکھا دیا ہے تجھے کس نے زندگی کا ہنر
سانپ سانپوں کو نہیں کرڈستے مگر
آدمی نے آدمی کو ڈس لیا
کسی کی آنکھ سے بہتا ہوا سیہ کاجل
لگے ہے جیسے سیہ رات میں سیہ بادل
تیرا کرم خدایا یہ تیری عنایت ہے
یہ میرے شعروں میں جو سوز ہے روانی ہے
امید نو کی کرن تو کبھی کی پھوٹ چکی
مگر فلک پہ ابھی تک وہی اندھیرا ہے
